Day 349 : 寄件大作戰!

今朝一早去郵局寄住一個喼先。郵局開9點，佢返11點，於是決定9點半左右出發，我地有一個鐘時間。

去到屋企附近間An Post(愛爾蘭郵局的名字，同HK Post一樣係綠色，唔知係咪都係想去英化呢?)問過可以寄，但無磅，我地declare幾多就幾多。於是好努力咁包，包，包，勁多膠紙。
辛辛苦苦包好去寄，佢話無磅，如果寄出之後去到集中處理個office check過20KG會彈返轉頭，所以我唔敢寄。
於是郵局職員俾咗個地址，係附件一個包裹處理中心，可以去磅下件野有幾重。
由於時間已經差不多，唯有借架超級市場手推車，我自己推個箱返屋企。

返到屋企，打開門，閂咗alarm，之後同屋剛剛返到，自己又唔夠力搬個箱落手推車，
所以想佢幫手搬入屋…唔知係咪因為我係屋企出黎，完全唔知要入屋，佢兩個好茫然咁望住我。我唯有將今朝既事交代一次。

點知傾傾下，佢決定帶我去頭先郵局俾我個地址去磅下件野有幾重。去到嗰個中心無開，我打算返屋企星期二再算，點知佢話車我去另一間郵局，有個磅係counter出面，一定可以磅下。都幾遠，差不多十分鐘車程。

去到磅，20.5X，多咗500g。我問同屋趕唔趕，佢話ok，於是夾手夾腳開返個箱，攞個喼出黎，再攞d野出黎，又包返好個箱。最後佢仲教我問人攞個表黎填同教我填。

幾經波折，郵件以19.6KG寄出，即是20KG的郵費，連同掛號，€80.50。因為星期一bank holiday，所以星期二先真正會由郵局出發。但解決咗一件已經好好。今次真係好彩遇到我同屋岩岩返屋企。

雖然唔駛點用力搬，但頻撲咗一朝，其實都幾攰。

下晝煲咗紅蘿蔔蕃茄豆腐魚湯。隔咗個幾鐘，同屋突然敲我門，我以為係滾瀉，原來係房東叫我拎返架車返去，因為架車唔俾推出黎-_-老是常出現唔知係邊度監視我地既房東-_-其實我本身想聽朝佢返工之前先推返返去…結果都係自己去，順便買少少野。