Day 347 : 開戶口

好多人到埗後都會開個戶口，而當初唔知點解我地一直都無咁做，好似係因為唔想煩，又無需要，仲要覺得自己無乜錢，但其實好危險。

於是，相隔11個月之後，我地去荷蘭既時候好似開竅咁，覺得應該要個戶口，要張提款卡，之後個歐洲之旅會安全好多。

於是返到愛爾蘭即刻去稅局改地址。點知等封信等咗兩個幾星期-_-

【口述筆錄】
前兩日終於收到。於是去AIB約時間。市中心話要約一個星期(27/5 book，5/6)先得。於是聽建議去AIB dundrum既特別分行，可以即日處理。大約一點去到，預約到三點幾。

好先進，全程都係用iPad，如果唔係要confirm身份，除咗學生同未住夠兩年既人，其實網上交到文件的話都唔駛親身去。

好簡單咁開咗個戶口，有online banking，而家只係等張card寄到黎。希望我地搬走之前會收到啦，呢邊d效率係差d，而香港人又心急d。