Day 193 : Merry Christmas!

聖誕快樂！！！=)
第一次喺外國過聖誕！愛爾蘭同香港好唔同，聖誕節係家庭節日，多數人都會留喺屋企過。

愛爾蘭嘅12月25日就好似亞洲地區過年初一咁，全城暫停運作。街上的全部店鋪都會閂門，連年終無休嘅酒店、餐館都唔會開，只有真係好少數嘅店會開一段短時間，就好似死城咁。仲要無公共交通工具，淨係可以搭的士、踩單車同行路，對遊客同無車的人(即係我地)嚟講都幾唔方便。

終於有一日可以一齊唔駛返工，兩個人瞓到夠先起身=)食個lunch、玩下電腦，染咗個髮，無咗頭頂兩截色，但cover唔到漂咗個part-_-下午整咗個燒雞心，都幾好食，但有d麻煩，應該無下次。差不多五點，有好心人安排到同事車順路帶我地出市中心，等我地唔駛行兩個鐘出去T_T

出到city果然無乜人，今日五六點就好似平時夜晚十一點左右。去到佢舖頭有少少早，但都ok，無幾耐都有好多我都識既人到咗。今晚個christmas party都係打邊爐、抽獎。抽到一架遙控直升機，另外交換禮物我地用咗一箱中國式雜貨換咗一支hand cream，氣氛都幾好。

椒鹽龍蝦仔!原本以為係瀨尿蝦XD

抽完獎基本就散場，但我地未食飽就stay咗係度食多少少，有d人去唱k。結果越來越多人同我地一齊食，跟住吹水，吹吹下就到11點左右。

跟住因為我地無車返屋企，一係行一係打的，不過今日突然間凍咗好多，而且路程唔近又會經過d雜區，所以都係搭的士啦。原本以為christmas搭的士會好貴，有人話收三倍、有人話起錶會貴d，實情係起錶同平時一樣，但跳錶個分段會一開始就跳最遠程個價錢，我地由市中心返walkinstown，7km用咗€15，係一個合理價錢。兩個人搭巴士都要€5。

都柏林的士係普通私家車款加個的士燈，所以好多都唔同款，主要係黑色同銀色。起錶€4.xx，乘客多過一個，第二個人開始會每個人頭收多€1，之後就係跳錶，點跳法我就唔係好明，但尋晚幾百米(200?!)就跳20cents。正正常常機場出市中心應該€20內ok，去到十二區都應該係€25-30。的士來講、歐洲物價來講，其實唔貴。