Day 64 : 發噩夢

唔知係咪因為尋晚發噩夢，今日心情唔係太好，夜晚仲煮咗餐難食到自己都唔想食嘅飯。

個夢真係好恐怖，我到而家都仲記得。
喺一個好似舖頭的環境，我見到有人喺樓下殺咗個男人，然後唔知邊個話佢知整個公仔可以減輕怨念。我就繼續做paper無出聲扮唔知。隔咗一陣，有個女仔(夢中係我舊同學)拎個公仔嚟，仲有段短片。我無睇但望咗一眼，咁就出事。佢行開咗，我即刻打俾Benny問佢係邊叫佢救我，點知佢話佢去咗葵芳，之後有另一個女仔上咗嚟，無幾耐，我就開始講唔到嘢，個樣變咗好似雞蛋與羔羊謝安琪嗰個妝。我係咁同另一個女仔講，係嗰個女仔做(呢個時候佢改咗名做charlie)，但發唔到聲。想用手機打出嚟，打到一半就閃吓閃吓，我好驚，不停想嗌都發唔到聲。
就係呢個時候，我隔離嗰個瞓瞓吓郁咗，所以我醒咗可以脫離個夢。

今日搵到個今年WHM的Blog，點解人洗頭我洗頭，我人工低咁多…加上尋日又俾人話我真係好低人工，突然間好想轉工。但係九月尾就去三個星期旅行，好矛盾。我好肯定蜜月期真係過咗，仲要呢排好多日都無小費。=(

今日老闆問起我同Benny點識，佢點追我。講起都失禮，因為我其實無乜印象，好普通嗰種。佢問我benny有無買嘢俾我，諗返起，追我嗰陣連飯都無請過我食。好似有少少蝕底。